МУИС-ийн Хууль зүйн сургуулийн бидний төгсөлтийнхөн эрх зүйч болцгоож, бакалаврын диплом өвөртөлснөөс хойш яг 20 жил өнгөрчээ. Шинэхэн эрх зүйч нар практикт хөл тавьж, дор дороо л хүсэл, чадлынхаа хэрээр хөдөлмөрлөж, өөр өөрсдөдөө эрдэм ухааны болоод эдийн баялаг хураахын зэрэгцээ энэ улсдаа, эргэн тойрондоо Үндсэн хуулийнхаа үнэт зүйлсийг хамгаалагч, нийгмийн зүг чигийн хөтөч болон явж байна.
Энэ хугацаанд хүний амьдралыг захирч байгаа хууль, журмууд нэмэгдсээр тэр нь ээдрээ, төвөгтэй байх нь элбэгшсээр. Явсаар энэ нь эрх зүйч нарын гарцаагүй чухлыг мөн харуулсаар. Төрийн алба хаагчид нь түүгээрээ үүргээ гүйцэтгэж, байгууллага, компанийн хуулийн зөвлөхүүд бас өмгөөлөгч нар нь зөвлөгөөгөө өгч, хууль зүйн туслалцаа үзүүлэх гэх мэтээр эрх зүйчийн мэдлэг, чадвараа ашиглацгааж байна.
Эрх зүйч хүн оногдсон, сонгосон ажлаа хийж, үр шимийг нь хүртээд өрх гэрээ өөд нь татаад явах жирийн хүнд байх хувь тавилантайн зэрэгцээ энэ нийгмийн амин чухал үнэт зүйлс - хүний эрх, эрх чөлөө, ардчилсан ёс, төрийн эрх мэдэл хуваарилах зарчим зэрэг ойлголтын “цаадах, наадах” -ыг ухаж таньсны хувьд үүний манаанд үүрд зогсох хүн ёсны үүрэг тэдэнд бас бий. Манаанд нэр төртэй зогсох нь сургуулиас төрж гарсан эрх зүйч, хуульчийн мэдлэг боловсролын цараанаас хамаарах ч хамгийн чухал нь гагцхүү өөртөө ямар хандлага бүтээж, тогтоосноос ихээхэн шалтгаалж байна.