Номын танилцуулга

“Үндсэн хуулийн нэмэлт, өөрчлөлт” хэмээх III ботид 7 өгүүлэл, илтгэл, санал багтсан. Үүнд Үндсэн хуульд оруулах нэмэлт, өөрчлөлтийн төслийг 2015 онд Улсын Их Хуралд өргөн мэдүүлсэн үеэс хойш 2017 он хүртэл Монгол Улсад парламентын тогтолцоо, үүний дотор хууль тогтоох болон гүйцэтгэх эрх мэдлийн хяналт, тэнцлийг сайжруулахад чиглэсэн судалгааг эмхэтгэсэн байна. Мөн, 2016-2019 онд Үндсэн хуульд нэмэлт, өөрчлөлт оруулахад олон нийтийн болон мэргэжлийн оролцоо, улс төрийн зөвшилцөл, ил тод, судалгаатай байдлыг хэрхэн хангасан тухай өгүүлжээ. Эцэст нь, 2019 оны Үндсэн хуулийн нэмэлт, өөрчлөлтөөр Монгол Улсад парламентын тогтолцоог хэрхэн бэхжүүлсэн тухай, мөн уул нэмэлт, өөрчлөлтийн зарим заалт буюу газрын хэвлийн баялаг ашиглахад баримтлах зарчим, УИХ-ын хянан шалгах түр хорооны талаарх үзэл баримтлалыг тайлбарлажээ.