Эрүүдэн шүүхтэй тэмцэх нь

Эмнести Интернэшнл

Судалгааны тайлан

Үндсэн хуулийн эрх зүй

Хүн эхээс төрөхдөө эрүүдэн шүүгч болж төрдөггүй, харин тэд ямар нэгэн зүйлээс сэдэл авч, хэн нэгнээс суралцаж, өдөөгдөж, бэлтгэгдэж байдаг. Олонх тохиолдолд энэ нь эрүүдэн шүүх болон зүй бусаар хандахад ашиглах албадлагын хэрэгслийг үйлдвэрлэж, ханган нийлүүлж байгаа гадаадын компани, аль нэг улсын засгийн газар болон дээрх хэрэгслийг өндөр төвшинд эзэмшсэн мэргэжилтнүүдтэй холбоотой байх нь бий. Нэг хэсэг улс нь дээрх зүй бус худалдаанд шууд хамааралтай байхад, нөгөө хэсэг улс нь мэдсэн ч мэдээгүй дүр эсгэдэг.

Эрүүдэн шүүх хэрэгслийн зарим нь мөн чанарын хувьд туйлын харгис бөгөөд эдгээрийг хэрэглэх нь эрүүдэн шүүх болон бусад хэлбэрээр хэрцгий, хүнлэг бусаар харьцаж шийтгэж байгаа үйлдэлд ямар ч эргэлзээгүйгээр хамаарна. Эдгээрт дундад зууны үед түгээмэл хэрэглэж байсан хөлний дөнгө, хүзүүний гав, өргөст бороохой, төмөр гинж болон ташуур, түүнчлэн эдүгээ бидний үед хэрэглэж байгаа хүчтэй өвтгөх зориулалт бүхий орчин үеийн хэрэгсэл гэгдэх цахилгаан бороохой, цахилгаан гүйдлээр цохигч буу, бүс зэргийг нэрлэж болно. Эдгээр хэрэгслийг хууль сахиулах үйл ажиллагаанд ашиглахыг бүрэн хориглох нь зүйтэй. Харин нулимс асгаруулагч хий болон цацлага, гав зэргийг хуульд заасан үндэслэл, журмын дагуу олон улсын хэм хэмжээнд нийцүүлэн зохистойгоор хэрэглэхийг зөвшөөрч болно. Гэхдээ эдгээрийг хүнийг эрүүдэн шүүх болон бусад байдлаар зүй бус хэрцгий хандах зорилгоор ашиглаж байдгийг санах хэрэгтэй. Тиймээс дээрх хэрэгслийн худалдаа, ашиглалтад хуулийн чанга хатуу зохицуулалт шаардлагатай.

Сүүлийн жилүүдэд дэлхийн олон улс үндэстэн эрүүдэн шүүх хэрэгслийн худалдааг хориглон хязгаарлах дотоодын болон бүс нутгийн эрх зүйн зохицуулалтыг хөгжүүлэх чиглэлд ахиц дэвшил гаргасаар байна. Үүнд Европын холбооны жишээг дурдаж болно. Дээрх зорилгын хүрээнд 2017 оны 9 дүгээр сарын 18-ний өдөр Эрүү Шүүлтийн хэрэгслээс ангид худалдааг дэмжих Дэлхийн Холбоо байгуулагдсан бөгөөд эдүгээ тив дэлхийн 60 гаруй улс “Эрүү шүүлт, цаазын ялыг гүйцэтгэхэд ашигладаг хэрэгслээс урьдчилан сэргийлэх, хязгаарлах, хориглох” болон “дээрх хэрэгслийн худалдааг хориглон хязгаарлах үр нөлөөтэй эрх зүйн механизмыг бий болгох” зорилго бүхий Бодлогын Тунхаглалд гарын үсэг зуржээ.

Эмнести Интернэшл болон Омега Судалгааны Сан нь дээрх санаачлагыг сайшаан дэмжиж байгаа бөгөөд дэлхийн олон улс энэхүү бодлогыг хөхиүлэн дэмжихийг уриалж байна. Дэлхийн Холбоо нь эрүү шүүлтийн хэрэгслийн худалдаатай тэмцэх үндэсний болон олон улсын түвшний үр нөлөө бүхий механизмыг хөгжүүлэх, дэмжих чиглэлд хангалттай нөөц бололцоотой болохыг тэмдэглэх нь зүйтэй.

эрүүдэн шүүлт, хориглосон болон хяналттайгаар хэрэглэх зэвсэг, хэрэгсэл, хориглох шаардлагатай тусгай хэрэгслүүд, хяналттайгаар хэрэглэвэл зохих тусгай хэрэгсэл

2018-07-04

26

Монгол

Бүрэн эхээр нь үзэх

2021-10-14

3011

38

40

Эмнести Интернэшнл “Эрүүдэн шүүхтэй тэмцэх нь” (2018), ... дахь/дэх тал. Legaldata-аас унших боломжтой: https://legaldata.mn/b/1064

Бүтээлийг цуглуулгандaa нэмэхийн тулд нэвтэрсэн байх шаардлагатай.
Бүртгэлтэй бол нэвтрэх | Бүртгэлгүй бол бүртгүүлэх