Үндсэн хуулийн цэцийн шийдвэрийн дүн шинжилгээ: Ц.Нямдоржийн эсрэг Д.Ламжав нар (2007)

Одонхүүгийн Мөнхсайхан

Эрх зүйн шүүмж

Үндсэн хуулийн эрх зүй, Үндсэн хуулийн процесс

УИХ-ын дарга Ц.Нямдорж 2006 онд УИХ-ын нэгдсэн чуулганаар баталж эцсийн найруулгыг нь УИХ-д танилцуулсан хуулиудын эцсийн найруулгыг агуулга, бодлого, зарчмын хувьд зассан бөгөөд ийнхүү зассан хуулиудаа УИХ-д танилцуулахгүйгээр ёсчилсон нь Үндсэн хууль зөрчсөн бөгөөд түүнийг УИХ-ын даргын албан тушаалаас нь огцруулах үндэслэл мөн гэсэн мэдээллийг иргэд Үндсэн хуулийн цэцэд өгчээ. 2007 оны 03 дугаар сарын 02-ны өдөр Үндсэн хуулийн цэц УИХ-ын дарга Ц.Нямдоржийн хууль зассан үйл ажиллагаа нь УИХ-ын хууль тогтоох бүрэн эрх (Монгол Улсын Үндсэн хуулийн 20 дугаар зүйл болон 25 дугаар зүйлийн 1 дэх хэсэг), хууль дээдлэх ёс, ардчилсан ёс (Монгол Улсын Үндсэн хуулийн 1 дүгээр зүйлийн 2 дахь хэсэг)-ийг зөрчсөн гэж үзсэн ч түүнийг албан тушаалаас нь огцруулах талаар иргэд Цэцэд хандах эрхгүй гэж шийдвэрлэсэн (Ц.Нямдоржийн маргаан II). Иргэд УИХ-ын даргын өөр хуулиудыг зассан асуудлаар Цэцэд дахин мэдээлэл гаргасан байна. Энэ удаа буюу 2007 оны 05 дугаар сарын 23- ны өдөр Цэц УИХ-ын дарга Ц.Нямдоржийн хуулиудыг зассан үйл ажиллагаа нь Үндсэн хуулийн 20 дугаар зүйл, 25 дугаар зүйлийн 1 дэх хэсэг, 1 дүгээр зүйлийн 2 дахь хэсгийг тус тус зөрчсөн төдийгүй нь түүнийг УИХ-ын даргын албан тушаалаас огцруулах үндэслэл болно гэж шийдвэрлэсэн (Ц.Нямдоржийн маргаан I)

Ц.Нямдоржийн маргаан I болон Ц.Нямдоржийн маргаан II нь Цэцийн түүхэн дэх хамгийн шилдэг шийдвэрүүдэд зүй ёсоор тооцогдохоос аргагүй юм. Учир нь, Цэц УИХ-аас баталсан хуулиудыг агуулга, бодлого, зарчмын хувьд өөрчлөн зассан гэдгийг баримтад тулгуурлан тогтоогоод зогсохгүй энэ үйлдэл нь Үндсэн хуулийн холбогдох заалтыг ноцтой зөрчсөн гэдгийг үндэслэлтэйгээр гаргаж тавьсан. Цэц ихэнх шийдвэртээ үндэслэл бичдэггүй бол энэ маргааныг шийдсэн дүгнэлтүүддээ үндэслэлээ илүү дэлгэрэнгүй бичсэн юм. Мөн, “аливаа төрийн байгууллага, албан тушаалтанд хуулиар зөвшөөрснөөс бусдыг хориглодог нь нийтээр хүлээн зөвшөөрөгдсөн эрх зүйт төрийн үндсэн зарчим мөн” гэдгийг Цэц дүгнэлтдээ бичсэн нь энэхүү маргааныг шийдвэрлэх чухал үндэслэл болсон төдийгүй эрх зүйт төр Монголын Үндсэн хуулийн салшгүй хэсэг учраас түүний бусад бүх зарчмыг төрийн аливаа байгууллага, албан
тушаалтан биелүүлэх үүрэгтэй гэдгийг хүлээн зөвшөөрсөн явдал болсон.

УИХ-ын дарга, хууль дээдлэх ёс, эрх зүйт төр, ардчилсан ёс, хууль тогтоох эрх мэдэл, Үндсэн хуулийн цэц, үндсэн хуулийн хяналт

2018-04-12

20

Монгол

Бүрэн эхээр нь үзэх

2020-09-07

4170

313

18

О.Мөнхсайхан “Үндсэн хуулийн цэцийн шийдвэрийн дүн шинжилгээ: Ц.Нямдоржийн эсрэг Д.Ламжав нар (2007)” (2018), ... дахь/дэх тал. Legaldata-аас унших боломжтой: https://legaldata.mn/b/767

Бүтээлийг цуглуулгандaa нэмэхийн тулд нэвтэрсэн байх шаардлагатай.
Бүртгэлтэй бол нэвтрэх | Бүртгэлгүй бол бүртгүүлэх