---

Өмгөөллийн тухай хуулийн 14 дүгээр зүйлийн 14.1.14 дэх заалт, 24 дүгээр зүйлийн 24.1 дэх хэсэгт зааснаар өмгөөлөгч өмгөөллийн үйл ажиллагаанд алдаа гаргаж, үйлчлүүлэгчид хохирол учруулсан тохиолдолд түүнийг нөхөн төлөх зорилгоор мэргэжлийн хариуцлагын даатгалд заавал даатгуулах үүрэгтэй. Мөн Өмгөөллийн тухай хуулийн 11 дүгээр зүйлийн 11.1.8 дахь заалтад зааснаар өмгөөлөгч нь энэхүү үүргээ зургаан сараас дээш хугацаагаар биелүүлээгүй тохиолдолд өмгөөллийн үйл ажиллагаа эрхлэх эрхийг хүчингүй болгох үндэслэл болдог.

Тэгвэл Легал датагаас өмгөөлөгчийн “мэргэжлийн хариуцлагын даатгалд даатгуулах” үүргээ биелүүлэх үйл ажиллагааг бүрэн цахимжуулж, өмгөөлөгч proger.mn вэб сайтаар дамжуулан даатгалын компанитай даатгалын гэрээг цахим хэлбэрээр байгуулах, даатгалын хураамжийг цахимаар төлөх, даатгалын гэрээний цахим хувилбарыг мэйл хаягаараа хүлээн авах боломжийг бүрдүүллээ. Өмгөөлөгч уг үйлчилгээг ашиглахын тулд нэмэлт төлбөр төлөх шаардлагагүй.

---