Эрүүгийн хуулийн тайлбар: Онол, арга зүйн зарим асуудал

Лхагвасүрэнгийн Галбадар

Магистрын ажил

Эрх зүйн онол & Философи, Эрүүгийн эрх зүй

Аливаа хуулийг хэрэглэх явцад зарим тохиолдолд хуулийн хэм хэмжээ, нэр томъёо, үг үсгийг тайлбарлах, зайлшгүй шаардлага үүдэн гардаг байна. Хууль тогтоогчийн зарим нэг утга санаа, агуулга, нэр томъёо зэрэг нь тодорхой бус, ойлгомжгүй байх, хоёрдмол санааг илэрхийлэх явдал амьдралд олонтой гарч ирдэг. Ийм учраас дагаж мөрдөж байгаа Монгол улсын Үндсэн хуульд заасны дагуу Үндсэн хуулиас бусад хуулийг Улсын дээд шүүх тайлбарлаж байхаар тогтоосон. Хуулийг тайлбарлах асуудал нь хууль хэрэгжүүлэх үйл ажиллагааны салшгүй бүрэлдэхүүн хэсэгт хамаарна. Хуулийг буруу ойлгож хэрэглэснээс болж хэрэг маргааныг үндэслэлгүй шийдвэрлэх, хүний эрх зөрчих ял завшуулах эсхүл хэт хатуу ял оногдуулах зэргээр хууль ёс зөрчигдөхөд хүргэж болзошгүй үр дагаврыг бий болгоно. Тэр тусмаа Эрүүгийн хуулийг төсөөтэй хэрэглэхийг хориглосон байдаг учраас ялангуяа Эрүүгийн хуулийг тайлбарлах асуудал хууль зүйн шинжлэх ухааны судалгааны нэн чухал объектын нэг болдог байна. Шүүхээс гаргасан шийдвэр өөрчлөгдөх, шүүхэд олон нийт итгэл алдах, хуулийг завхруулах, гуйвуулах, хуулиас тойрч гарах явдал нь хуулийг буруу тайлбарласантай гол төлөв холбогддог. Сүүлийн жилүүдэд МУИС-ийн Хууль зүйн сургуульд хамгаалагдсан магистрын ажлын судалгаанд ялангуяа Эрүүгийн хуулийг тайлбарлах талаар хийгдсэн ажил туйлын ховор байгаа нь магистрантыг энэ сэдвийг сонгон судлахад хүргэсэн гэж үзэж болно. Эрүүгийн хуулийг тайлбарлах асуудлыг судлахдаа эрх зүйн онолтой нягт уялдуулан авч үзэх, түүнчлэн ялангуяа харьцуулсан эрх зүй судлал, түүний дотор эрх зүйн хамгийн томоохон бүл болох Англи-Америкийн эрх зүйн бүл ба Эх газрын бүл дэх хууль тайлбарлах онцлогийг авч үзэх явдал энэхүү сэдвийг сонгон авах бас нэгэн шалтгаан болсон юм. Улсын их хурал шинэ хуулиуд, батлан гаргасныхаа дараа дагаж мөрдүүлэх журмын тухай хууль батлахдаа Улсын Дээд Шүүхэд тухайн хуулийн талаар тайлбар гаргах үүрэг хүлээлгэж ирсэн нь Улсын Дээд Шүүхийн тайлбараар хууль тогтоогчийн утга санаа, түүний агуулга зарим талаар алдагдаж байсан эсэхийг судлах явдал энэхүү сэдвийг сонгон авах, бас нэгэн үндэслэгээ болсныг тэмдэглэж байна.

эрүүгийн хууль, эрүүгийн хуулийг тайлбарлах, эрүүгийн хуулийн тайлбар, хууль тайлбарлах онол,

2015-10-15

76

Монгол

Бүрэн эхээр нь үзэх

2023-02-17

5710

219

200

Л.Галбадар “Эрүүгийн хуулийн тайлбар: Онол, арга зүйн зарим асуудал” (2015), ... дахь/дэх тал. Legaldata-аас унших боломжтой: https://legaldata.mn/b/1505

Бүтээлийг цуглуулгандaa нэмэхийн тулд нэвтэрсэн байх шаардлагатай.
Бүртгэлтэй бол нэвтрэх | Бүртгэлгүй бол бүртгүүлэх