Энтимема чөлөөт хуудас, 2004, №6

Энтимема эрдэм шинжилгээний клуб

Мэдээллийн хуудас

Үндсэн хуулийн эрх зүй, Захиргааны процессын эрх зүй, Ашигт малтмал

Агуулга:
1) Д.Батболд-"Сумын ердийн ашигт малтмал эзэмших, ашиглах эрх"
2) Мэргэдийн ертөнц-Мэдэхэд илүүдэхгүй онч үгс
3) Ж.Булгантамир-"Захиргааны маргааны явцад хүний эрхийг хамгаалах асуудал" (нийтлэл)
4) Хүний эрхийн олон улсын нэр томъёоны тайлбараас

"Энтимема чөлөөт хуудас" сэтгүүлийн шинэ дугаарын эх миний өмнө байна. Түүний агуулгыг хараад сэтгэл хөдөлж талархлын үг бичихэд хүрэв.
Үндэсний хуульчдын ууган уурхай, эрдмийн тулах цэг нь болсон МУИС-ийн Хууль Зүйн Сургуулийн өнөөгийн хэсэг оюутан "Энтимема" клуб байгуулан сурах, судлах, туурвин бүтээх үйлсэд оюутан охид хөвгүүдийн сэтгэлийг гижигдэн, зүтгэлийг нэгтгэн эрдмийн замд хөтөлж буйд ахмад багш бивээр баясаж ханашгүй.
Эрдэмтэн багш нараасаа зуларч эрээн зах бараадан хэдэн "бор юм" хөөцөлдөөгүй "эдийн ашиг эхэндээ, эрдмийн ашиг эцэстээ" гэдэг онч мэргэн үгээр жигүүрлэж номын мөр хөөж яваад тань гүнээ талархана. Оюутан гэдэг алдрыг орь залуу насныхаа оройн чимэг болгон аз жаргалтай амьдралынхаа урт замд нөөц бэлтгэл болгон ном судар хурааж мэдлэг цуглуулан байгааг тань үнэхээр магтууштай.
Энэ ялдамд "Оюунтан" гэдэг алдрыг оноож өгсөн өвөг дээдсийнхээ ухааны ундрагыг бишрэн явдгаа онцлон хэлмээр санагдана. Ахмад үе маань тухайн үеийнхээ хууль тогтоомжийн дээж нь болсон 1940 оны Үндсэн хуульд Монгол орноо малчин, үйлдвэрчин, оюунтаны улс мөн гэж анхлан тодорхойлсон нь нэгэнтэйгүүр залуу үеийнхний охь болсон шинэ сэхээтнийг онож бэлгэджээ гэлтэй байдаг. Үе үеийн оюутан бол оргилж буй галт уул мэт эрч хүчтэй эрдэм номын мөр хөөгч мөн билээ. Өнөөдөр бэсрэг судалгаа хийж, бичиж орчуулж, бас нийтлүүлж буй нь эрдэм төгс болсных хараахан биш шүү! Харин оргил нь нүүгэлтэх өндөр оргил өөд мацаж, ёроол нь харанхуйлах гүн далайд шумбан эрднийн эс ширхэгийг чадан ядан цуглуулж буй эрэлчин гэдгээ гүнээ мэдэрч номхон даруу, нөр хичээнгүй байж, шантралгүй зүтгэвээс эцэстээ арвин шимийг нь хүргэж ард олонд тустай үйлсийг бүтээлцэнэ гэдгийг захья. "Номноос салахгүй хүний мэдлэг их, нойрноос салахгүй хүний зүүд их" гэдэг шүү. Нойроо хасч номоо үз, хоолоо хасаж онолыг бясалга, чөмгөө дундартал амьдралыг судалж, нүдээ чилж, мөрөө хөштөл бичиж туурви, хүчин хавсарч дүү нараа дагуул хэмээн танай клубынхэн хийгээд сэтгүүл эрхлэн гаргаж буй Зөвлөлийн гишүүн дүү нартаа ерөөж мэхийн ёсолсон эгэл багш Хариадынханы Бяраагийн ЧИМИД.

энтимема, оюутны клуб, эрдэм шинжилгээний клуб, чөлөөт хуудас, ашигт малтмал, маргааны явцад хүний эрхийг хамгаалах, захиргаа

2004-01-30

12

Монгол

Бүрэн эхээр нь үзэх

2024-09-10

474

5

Энтимема эрдэм шинжилгээний клуб “Энтимема чөлөөт хуудас, 2004, №6” (2004), ... дахь/дэх тал. Legaldata-аас унших боломжтой: https://legaldata.mn/b/2088

Бүтээлийг цуглуулгандaa нэмэхийн тулд нэвтэрсэн байх шаардлагатай.
Бүртгэлтэй бол нэвтрэх | Бүртгэлгүй бол бүртгүүлэх