ХМХ | Гэр бүл болоогүй ч оролцоо, хувь нэмэр, хамтын ажиллагаа нь нотлогдож байгаа үед хэсгээр өмчлөх дундын өмчийн харилцаа үүссэн байх боломжтой

Judilogy

ХМХ | Хэргийн мэдээллийн хуудас нь шүүхээр шийдвэрлэгдэж хуулийн хүчин төгөлдөр болсон, хууль хэрэглээний нэгдмэл байдлын хангах, эрх зүйг хөгжүүлэхэд ач холбогдолтой маргаануудын товч дүн шинжилгээний цуврал

Мэдээллийн хуудас

Иргэний эрх зүй, Гэм хорын эрх зүй, Өмчийн эрх зүй, Компани

Д.А болон С.Б нар нь 2007 оноос хамтын амьдралаа эхлүүлж, 2014.12.24-ний өдөр гэрлэлтээ батлуулсан. Тэдний дундаас 2007.10.26-ны өдөр охин Б.Э (хамтран нэхэмжлэгч) төрсөн ба тэдний гэрлэлтийг 2021.05.14-ний өдөр шүүхийн шийдвэрээр цуцалж, гэр бүлийн хамтран өмчлөх дундын өмчийн маргааныг шийдвэрлэсэн.
2014.08.25-ны өдөр “Э” ХХК-ийг нэг хувьцаа эзэмшигч [С.Б]-ийн шийдвэрээр үүсгэн байгуулж, “Э” ХХК-ийн хувьцааг 2017 онд С.Б-с Б.З-д, 2018 онд Б.З-с “М” ХХК-д, 2019 онд “М” ХХК-с Б.Б болон Б.З нарт бэлэглэлийн журмаар шилжүүлж, одоогийн байдлаар хувьцааны 80 хувийг Б.Б, 20 хувийг Б.З нар тус тус эзэмшиж байна.
Нэхэмжлэгчийн тайлбар: Бид [Д.А, С.Б] 2000 оноос хойш 21 жил хамт амьдарсан. "Э" ХХК-ийг 2014 онд бид өөрсдийн хөрөнгөөр бий болгосон ба үүсгэн байгуулах санаачилгыг би нөхөртэйгөө хамт гаргасан. Тус компанийг бий болгоход зарцуулсан бүх хөрөнгө нь бидний хамтын амьдралын явцад бий болсон дундын өмчийн хөрөнгө. Гэтэл гэр бүлийн гишүүдийн хамтран өмчлөх дундын өмч хөрөнгийг миний зөвшөөрөлгүйгээр, бэлэглэлийн гэрээгээр өөрийн хуучин эхнэрийн хүүхдүүдэд [Б.З, Б.Б] шилжүүлэн өгсөн нь ИХ-ийн 56.1.1-т заасны дагуу хүчин төгөлдөр бус байх хэлцэл болно. Эдгээр гэрээнүүд нь надаас хөрөнгөө нуух зорилгоор хийгдсэн, тухайн бэлэглэлийн гэрээг байгуулж байгааг би мэдээгүй ба бид гэр бүлээ цуцлуулаагүй байсан. ИХ-ийн 56.5 дахь хэсэгт заасны дагуу “Э" ХХК-ийн хувьцаа эзэмшигч Б.З, Б.Б нар нь үндэслэлгүйгээр хөрөнгөжсөн болох нь тогтоогдсоноор тус компанийн хувьцаа нь хууль ёсны эзэмшигч нарт буцаан шилжиж, нэхэмжлэгч гэр бүлийн дундын өмчийн хөрөнгөөс өөрт [Д.А] болон охин [Б.Э]-доо ногдох хувьцаа болох 66 хувийг хууль ёсны дагуу эзэмших боломжтой болно.
Хариуцагч “Э” ХХК-ийн тайлбар: Компанийн хувьцаа нь зохигчийг гэрлэхээс өмнө бий болсон С.Б-н хуваарьт хөрөнгө, дундын өмч биш. Гэр бүлийн дундын өмчийн маргаан шүүхээр нэгэнт шийдэгдсэн, гэрээтэй холбоотой шаардлага гаргах хөөн хэлэлцэх хугацаа дууссан.
Хариуцагч Б.З, Б.Б нарын тайлбар: "Э” ХХК-ийн толгой компани байсан “М” ХХК болон “Э” ХХК-д Д.А нэг ч удаа хувьцаа эзэмшиж байгаагүй. Иймд "Э” ХХК-ийг нэхэмжлэх хууль зүйн үндэслэлгүй. Компанийн хувьцааг гэр бүлийн хамтран өмчлөх дундын өмчид тооцох боломжтой боловч “Э” ХХК-ийг гэр бүлийн дундын өмч болгож тогтоох хууль зүйн боломжгүй. Б.З-н эзэмшиж байгаа 20 хувь, Б.Б-н 80 хувийн хувьцааны хэдэн хувийг ямар үндэслэлээр шилжүүлж авах гээд байгаа нь ойлгомжгүй.
Хариуцагч С.Б, “М” ХХК-ийн тайлбар: Нэхэмжлэгчтэй 2007 оны 08 сараас нэг гэрт хамт амьдарч, 2007.10.26-ны өдөр охин Б.Э төрсөн, гэрлэлтээ 2014.12.24-ний өдөр батлуулж, улмаар шүүхийн шийдвэрээр цуцлуулсан. С.Б нь тэр үед Д.А-н бүх хүсэлтийг биелүүлж, орон сууц, үл хөдлөх эд хөрөнгө, бэлэн мөнгө, “М” ХХК-ийн 45 хувийн хувьцааг шилжүүлсэн. ИХШХШтХ-ийн 65.1.6-д заасны дагуу нэхэмжлэлд дурдсан үйл баримт нь шүүхийн шийдвэрээр тогтоогдсон тул хэргийг хэрэгсэхгүй болгох нь зүйтэй. Бэлэглэлийн гэрээг зөвхөн ИХ-ийн 280 дугаар зүйлд зааснаар хүчингүй болгодог ба энд тийм үндэслэл тогтоогдохгүй, хоёр тал харилцан тохиролцож, гэрээ байгуулсныг үндэслэн шийдвэрлэсэн шүүхийн шийдвэр байгаа.

Хэсгээр өмчлөх дундын өмчийн харилцаа, дундын өмчийн маргаан, гэрлэлтийн харилцаа, хамтран өмчлөх дундын өмч, гэр бүл, хамтын амьдрал, нотлох үүрэг

2025-05-28

4

Монгол

Бүрэн эхээр нь үзэх

2025-04-29

27

1

Judilogy “ХМХ | Гэр бүл болоогүй ч оролцоо, хувь нэмэр, хамтын ажиллагаа нь нотлогдож байгаа үед хэсгээр өмчлөх дундын өмчийн харилцаа үүссэн байх боломжтой” (2025), ... дахь/дэх тал. Legaldata-аас унших боломжтой: https://legaldata.mn/b/2378

Бүтээлийг цуглуулгандaa нэмэхийн тулд нэвтэрсэн байх шаардлагатай.
Бүртгэлтэй бол нэвтрэх | Бүртгэлгүй бол бүртгүүлэх