Холбооны Бүгд Найрамдах Герман Улсын хуульч бэлтгэх тогтолцоо

Дугарын Сүнжид

Энэхүү судалгааг ННФ-ын санхүүгийн дэмжлэгтэйгээр гүйцэтгэсэн болно.

Судалгааны тайлан

Боловсрол

ХБНГУ-д (цаашид Герман гэх) хуучны Пруссийн засгийн газраас авч хэрэгжүүлж байсан нэгдмэл сургалтын тогтолцоо нь 1877 оноос эхлэн шүүгч, өмгөөлөгч, прокурор болон бусад бүх л хуулийн мэргэшлийн үндэс суурь болсоор иржээ. Энэхүү тогтолцоо нь улсын шалгалтаар төгсдөг их сургуулийн дөрвөн жилийн сургалтыг хоёр жил болгон богиносгосон, хуульч бэлтгэх дадлагын практик сургалтаас бүрддэг. Германд хуульч болохын тулд хоёр шатны шалгалт өгөх ёстой бөгөөд нэгдүгээр улсын шалгалтыг их сургууль төгсөхдөө өгнө. Нэгдүгээр улсын шалгалт нь заавал үзэх ёстой салбар гурван эрх зүй, их сургуульд сонгон суралцсан хичээл буюу гүнзгийрүүлэн судалсан салбар хичээлийн агуулгаас бүрдэнэ. 2002 онд хийсэн шинэтгэлийн хүрээнд сонгон суралцах хичээлээр авдаг байсан их сургуулийн шалгалтыг нэгдүгээр улсын шалгалтын нэг хэсэг болгож өөрчилсөн байна.

Ийнхүү их сургууль төгсөж нэгдүгээр улсын шалгалтад тэнцэн, хуульч бэлтгэх дадлагад амжилттай хамрагдсан бол хоёрдугаар улсын шалгалт өгөх эрхтэй болох бөгөөд түүнд тэнцсэнээр мэргэшсэн хуульч болно. Энэхүү тогтолцооны гол давуу тал нь оюутанд шинжлэх ухааны гүнзгий мэдлэг эрчимтэй олгож, эрх зүйн ээдрээтэй маргааныг шийдвэрлэхэд сургах ба хоёр шатны шалгалт нь суралцагчийн чадварыг үнэлэх оновчтой шалгуур хэмээн үздэг. Хуульч бэлтгэх сургалтыг 1970-1980 онд нэг үе шаттай болгох оролдлого хийсэн ч энэ нь төдийлөн амжилтад хүрээгүй байна. Харин сургалтыг орчин үеийн чиг хандлагад нийцүүлэх чиглэлээр хэд хэдэн шинэтгэл хийгджээ.

Германы хуульч бэлтгэх тогтолцоо нь шүүгчийн ур чадварыг суралцагчдад эзэмшүүлсэн байх ёстой хэмээх үзэл баримтлалд суурилдаг. Өөрөөр хэлбэл, шүүгчээр ажиллах ур чадвар эзэмшсэн хуульч бусад бүх төрлийн хуульчийн ажлыг хангалттай гүйцэтгэх ур чадвартай гэж үздэгтэй холбоотой. Үүнийг Einheitsjurist буюу хуульч бэлтгэх нэгдмэл тогтолцоо гэж нэрлэдэг. Ийм үзэл баримтлалд суурилдаг тул Холбооны Шүүгчийн тухай хуулийн 5 дугаар зүйлийн зохицуулалт нь хуульч бэлтгэх эрх зүйн үндэслэл болдог байна.1 Олон улсын эрх зүйн холбогдол бүхий хөтөлбөрөөр 2002 оноос их сургуулийн сургалтын агуулгыг баяжуулж, өмгөөлөл төвтэй хичээлүүдийг нэмж оруулжээ.
Герман Улсын 16 муж улсад хуульчийн шалгалтын тусдаа журам үйлчилдэг хэдий ч эдгээр журам, зохицуулалтын үндсэн агуулга адил, холбооны улс даяар нэгдмэл зарчим баримталдаг.

Холбооны Бүгд Найрамдах Герман Улс, ХБНГУ, хуульч бэлтгэх тогтолцоо, боловсрол, шинжлэх ухаан, соёлын байгууллага, нийтийн эрх зүй, иргэний эрх зүй, эрүүгийн эрх зүй

2019-06-01

47

Монгол

Бүрэн эхээр нь үзэх

2023-05-17

1985

44

20

Д.Сүнжид “Холбооны Бүгд Найрамдах Герман Улсын хуульч бэлтгэх тогтолцоо” (2019), ... дахь/дэх тал. Legaldata-аас унших боломжтой: https://legaldata.mn/b/1587

Бүтээлийг цуглуулгандaa нэмэхийн тулд нэвтэрсэн байх шаардлагатай.
Бүртгэлтэй бол нэвтрэх | Бүртгэлгүй бол бүртгүүлэх