САНАМЖ: Энэхүү хураангуй нь гагцхүү олон нийтэд мэдээлэл болгох зорилготой бөгөөд хураангуйд ашигласан шийдвэр нь хуулийн хүчин төгөлдөр анхан шатны шүүхийн шийдвэр болно.

---

Шүүхийн шийдвэрийн дугаар: 2021/ШЦТ/595

Шүүхийн шийдвэрийн огноо: 2021 оны 10 дугаар сарын 27

Шүүгдэгч: Ш.Д

Хохирогч: Э.Ө

Шүүхийн шийдвэр: Олон төрлийн хольцтой, их хэмжээний согтууруулах ундааг богино хугацаанд уух хонжворт тэмцээн зохион байгуулсны улмаас хүний амь насыг болгоомжгүйгээр хохироосон.

Шийдвэрийн төлөв: Хүчин төгөлдөр анхан шатны шүүхийн шийдвэр.

Маргааны төрөл: “Хүний амь насыг болгоомжгүйгээр хохироох” гэмт хэрэг.

Шийдвэрийг бүрэн эхээр нь үзэх холбоос: Энд дарна уу.¹ 

ХЭРГИЙН ТУХАЙ ТОВЧ

1. Шүүгдэгч Ш.Д нь 2020 оны 01 дүгээр сарын 10-ны өдөр Чингэлтэй дүүргийн дугаар хорооны нутаг дэвсгэрт байрлах “G R” нэртэй цэнгээний газрын нээлтийн үеэр үйлчлүүлэгчдийн дунд олон төрлийн архи, согтууруулах ундааг хольж уух, уух бүрд мөнгө, валют хожих болзолтой тэмцээн зохион байгуулж, улмаар хохирогч Э.Ө уг тэмцээнд оролцох санал гаргаж их хэмжээний буюу 7 төрлийн 2 литр согтууруулах ундаа, 1 төрлийн 250 мл энергийн ундааг 3 минутын дотор нэг дор, тасралтгүй ууж спиртийн агууламжийн хурц хордлогод орж нас барсан хэргийн үйл баримт тогтоогджээ.

2. Чингэлтэй дүүргийн Эрүүгийн хэргийн анхан шатны шүүхийн 2021 оны 01 дүгээр сарын 12-ны өдрийн 2021/ШЦТ/49 дугаартай цагаатгах тогтоолоор гэмт хэргийн шинжгүй үндэслэлээр шүүгдэгчийг цагаатгаж шийдвэрлэсэн байна.

3. Прокурорын эсэргүүцэлд үндэслэн Нийслэл дэх Эрүүгийн хэргийн давж заалдах шатны шүүх хэргийг хянан хэлэлцээд 2021 оны 04 дүгээр сарын 21-ний өдрийн 2021/ДШМ/400 дугаартай магадлалаар хэргийн анхан шатны шүүхээр дахин хэлэлцүүлэхээр буцаажээ.

ХУУЛИЙН ХЭМ ХЭМЖЭЭ

4. Шүүхээс Ш.Д-г тэмцээн зохиож олон төрлийн найрлага бүхий согтууруулах ундааг нэг дор, их хэмжээгээр, богино хугацаанд, хольж хэрэглэснээр хүний эрүүл мэнд, амь насанд хохирол учрах боломжтойг урьдчилан мэдэх ёстой байсан боловч мэдэлгүйгээр хайхрамжгүй хандсан үйлдэл нь хохирогчийн амь нас хохирсон үр дагавартай шалтгаант холбоотой байна хэмээн дүгнэж;

5. Эрүүгийн хуулийн 10.6 дугаар зүйлийн 1 дэх хэсэгт заасан “Хууль, түүнд нийцүүлэн гаргасан захиргааны хэм хэмжээний акт, хэлцлээр хүлээсэн үүргээ биелүүлээгүй, эсхүл бусад болгоомжгүй үйлдэл, эс үйлдэхүйн улмаас хүний амь насыг хохироосон” гэмт хэрэг үйлдсэн гэм буруутайд тооцжээ.

ШИЙДВЭРЛЭСЭН БАЙДАЛ

6. Анхан шатны шүүхээс шүүгдэгчийн Эрүүгийн хуулийн 10.6 дугаар зүйлийн 1 дэх хэсэгт заасан “хүний амь насыг болгоомжгүйгээр хохироох” гэмт хэрэг үйлдсэн гэм буруутайд тооцож, мөн хуулийн ерөнхий ангийн 7.1 дүгээр зүйлийн 1 дэх хэсэгт заасныг журамлан хорих ял оногдуулахгүйгээр 1 жилийн хугацаанд тэнсэж, 7.3 дугаар зүйлийн 2 дахь хэсгийн 2.5 дахь заалтад зааснаар оршин суух газар, ажил, сургуулиа өөрчлөх, зорчин явахдаа хяналт тавьж байгаа эрх бүхий байгууллагад мэдэгдэх үүрэг хүлээлгэж шийдвэрлэжээ.

-оОо-

 

1. Эрүүгийн эрх зүйн маргааны шүүхийн шийдвэрийн хураангуйг боловсруулахдаа Чингэлтэй дүүргийн Эрүүгийн хэргийн анхан шатны шүүхийн 2021 оны 10 дугаар сарын 27-ны өдрийн 2021/ШЦТ/595 дугаартай шийтгэх тогтоолыг ашигласан болно.

Холбоосууд:

• ШИНЭ БҮТЭЭЛ
• ЭРЭЛТТЭЙ