Зээлдэгчийн эрх ашигт илт хохиролтойгоор хүү тогтоогдсон бол....

2022-09-30 Хан-Уул дүүргийн Иргэний хэргийн анхан шатны шүүх

Туршилтаар

Иргэн Хуягаа /товчилсон нэрээр/ бизнесийн үйл ажиллагаандаа зориулж иргэн Туяа /товчилсон нэрээр/-аас 230.000.000 төгрөгийг 2 сар 10 хоногийн хугацаатай, сарын 10 хувийн хүүтэй, үүргээ биелүүлээгүй тохиолдолд хугацаа хэтэрсэн хоног тутамд 0.5 хувийн алданги төлөхөөр тохирч, 2020 оны 5 дугаар сарын 20-ны өдөр зээлийн гэрээ байгуулсан, Туяа 230.000.000 төгрөгийг 3 хувааж, Хуягаагийн дансаар шилжүүлсэн байна.

Туяа нь Хуягааг үндсэн зээлийг хугацаа хэтрүүлж төлсөн, зээлийн хүүг дутуу төлсөн гэж, зээлийн хүүнд 30.938.356 төгрөг, алдангид 174.225.000 төгрөг, нийт 205.163.356 төгрөг гаргуулахаар хүүг гэрээнд зааснаар, алдангийн хэмжээг хуульд нийцүүлэн 50%-иар тооцож нэхэмжилсэн.

Харин Хуягаа шүүхэд тайлбарлахдаа зээлийн гэрээг бичгээр байгуулаагүй, ийм өндөр хүү, алданги төлөхөөр тохироогүй, хожим баримт хэрэгтэй байна гэхэд нь итгэж гарын үсэг зурсан, цар тахалтай холбоотойгоор зээлийн хүүг 5%-иар бууруулж 68.142.952 төгрөг төлөхийг зөвшөөрнө, алданги төлөхийг зөвшөөрөхгүй гэдэг.

Хуягаа 2021 оны 02 дугаар сарын 25-ны өдөр зээлийн үлдэгдэл төлбөр 475.000.000 төгрөгийг харилцан тохирч, 350.000.000 төгрөг болгон, 3 хуваан төлж тооцоо дуусгана гэж гарын үсгээ зурсан, 2021 оны 10 дугаар сарын 01-ний өдөр үндсэн зээл 230.000.000 төгрөг, үлдэгдэл хүүг төлнө гэж хоёр тал гарын үсгээ зурснаас харахад мөнгийг хэрхэн төлөх талаар талууд тохиролцсноос гадна Хуягаа өмнө үүссэн үүргийн харилцааг хүлээн зөвшөөрсөн, тэдний хооронд зээлийн гэрээний харилцаа үүссэн гэж дүгнэсэн.

Туяа, Хуягаа нар зээлийн хүү, алдангийг хэрхэн төлөх талаар бичгээр байгуулсан гэрээндээ тохирсон, Туяа хүү, алданги нэхэмжлэх эрхтэй ч шүүхээс зээлдэгчийн эрх ашигт илт хохиролтойгоор хүү тогтоогдсон бол зээлдэгчийн хүсэлтээр хүүг багасгаж болохоор, анзын хэмжээ илт их байвал хэргийн нөхцөл байдлыг харгалзан багасгаж болохоор хуульд заасан байдаг.

Иймд Туяагийн сарын хүүг 10%-иар тооцож нэхэмжилснийг 5%, цар тахал, түүний улмаас тогтоосон хорио цээр нь аж ахуй нэгж, иргэдийн санхүү, төлбөрийн чадварт сөргөөр нөлөөлж байгаа болон хариуцагч Хуягаагийн хүсэлтийг тус тус харгалзан алдангийн хэмжээг хуульд заасан хэмжээнээс 60 хувиар бууруулж, Хуягаагаас хүү, алдангид 84.123.289 төгрөгийг гаргуулж, Туяад олгож, 121.040.069 төгрөг нэхэмжилсэн хэсгийг хэрэгсэхгүй болгож шийдвэрлэсэн.

Хүчин төгөлдөр болсон эсэх: Хүчин төгөлдөр болсон.

Хан-Уул дүүргийн Иргэний хэргийн анхан шатны шүүхийн 2022 оны 01 дүгээр сарын 17-ны өдрийн шийдвэр, дугаар: 183/ШШ2022/00150

Хураангүйг бэлтгэсэн: Хан-Уул дүүргийн Иргэний хэргийн анхан шатны

шүүхийн Ерөнхий шүүгч Д.Даваасүрэн

Санамж: Энэ хураангуй нь шүүхийн шийдвэр биш бөгөөд түүнийг орлохгүй, зөвхөн олон нийтэд ойлгомжтой байдлаар мэдээлэл хүргэх зорилготой болно.

Хан-Уул дүүргийн Иргэний хэргийн анхан шатны шүүхийн шийдвэрийн дэлгэрэнгүйтэй энд дарж танилцана уу.

Холбоосууд:

https://bit.ly/3rgBlKP
https://bit.ly/3RiRCJG

МЭДЭЭ, МЭДЭЭЛЭЛ

Монгол Улсын Иргэний хуулийн тайлбарыг legaldata.mn-д байршуулна.

5 hours ago

2024 оны 11 дүгээр сарын эрэлттэй бүтээлийн чансаа

2 weeks ago

Хуульчийн ажлын байрны үзэсгэлэн яармаг 2024 арга хэмжээнд хэлэлцэх хэлэлцүүлэг болон ярилцлагын сэдэв, зочид

2 weeks ago

Хуульчийн ажлын байрны үзэсгэлэн яармаг болно

2 weeks ago

Бусад мэдээ, мэдээлэл

ШҮҮХИЙН ШИЙДВЭРИЙН ХУРААНГУЙ

Бүгд