Хүнийг албадан эмчлүүлэх асуудлыг шийдвэрлэхэд хүүхдийн эрхийг харгалзан үзнэ

2023-02-05 Дорноговь аймгийн Эрүү, Иргэний хэргийн давж заалдах шатны шүүх

Шийдвэрийн дугаар: Дорноговь аймгийн Эрүү, Иргэний хэргийн давж заалдах шатны шүүхийн 2022.12.12-ны өдрийн магадлал №202/МА2022/00025

Шүүхийн шийдвэрийн тойм №01, 2023.01.12

Шийдвэрийн төлөв: Хүчин төгөлдөр болсон.

Санамж: “Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.”

Дорноговь аймаг дахь Цагдаагийн газраас “Согтуурах, мансуурах донтой хүнийг захиргааны журмаар албадан эмчлэх” журмын дагуу иргэн Т-г албадан эмчилгээнд хамруулах хүсэлтийг шүүхэд гаргасан, иргэн Т үүнийг эс зөвшөөрч “... албадан эмчилгээнд явахыг зөвшөөрөхгүй, 9 настай охиныг харж хандах хүн байхгүй ...” гэж маргажээ.

Анхан шатны шүүх Цагдаагийн байгууллагаас ирүүлсэн хүсэлтийг хангаж, Т-г албадан эмчилгээнд хамруулахаар шийдвэрлэснийг иргэн Т эс зөвшөөрч “... нөхөр Ц-г албадан эмчилгээнд явуулах шийдвэр гарсан, ... Иймд өөрөө охиноо харах шаардлагатай болж байна ... ” гэх үндэслэлээр давж заалдсан гомдол гаргасан байна.

Давж заалдах шатны шүүх хэргийг хянаад анхан шатны шүүхийн шийдвэрийг хүчингүй болгож, Дорноговь аймаг дахь Цагдаагийн газрын “ … Т-г албадан эмчилгээнд хамруулах тухай” хүсэлтийг хэрэгсэхгүй болгож шийдвэрлэв.

Хүүхдийн эрхийг хамгаалах тухай хуульд зааснаар “хүүхэд эцэг эхтэйгээ амьдрах, тэдний анхаарал халамжид байх ... эрхтэй” бөгөөд хүүхдийн эх нь хүүхдээ асран хамгаалах, хүүхдийг наад захын хэрэгцээт зүйлээр хангах зэрэг үүрэгтэй байхад Т-г албадан эмчилгээнд хамруулахаар шийдвэрлэснээр түүний бага насны хүүхдийг хэн асран хамгаалах нь тодорхойгүй болж хүүхдийн эрх зөрчигдөх нөхцөл байдал үүссэн гэж давж заалдах шатны шүүх дүгнэв.

Түүнчлэн хуульд зааснаар, сайн дураараа эмчлүүлэхээс татгалзсан, өөртөө болон бусдад аюул учруулах эрсдэлтэй байдалд орсон бол уг этгээдийг “албадан эмчлэх”-ээр заасан, энэ тохиолдолд иргэн Т-г албадан эмчлэх шаардлагатай болсон үндэслэл, шалтгаан нөхцөл бүрэн тогтоогдоогүй гэж дүгнэн иргэн Т-ийн гаргасан давж заалдах гомдлыг хангаж шийдвэрлэсэн байна.

Шийдвэрийг бүрэн эхээр нь унших бол Энд дарна уу.

Тоймыг бэлтгэсэн: Дорноговь аймгийн Эрүү, Иргэний хэргийн

давж заалдах шатны шүүхийн Ерөнхий шүүгч Н.Батчимэг

Холбоосууд:

МЭДЭЭ, МЭДЭЭЛЭЛ

2025 оны 02 дугаар сарын эрэлттэй бүтээлийн чансаа

3 weeks ago

Ep45: Хүүхдийн хадгаламж ба зээлийн барьцаа

4 weeks ago

Ep44 | Газар эзэмших эрх дуусгавар болоход Засаг даргад газраа хүлээлгэн өгөх үүрэгтэй

1 month ago

Ep43 | ЗХХА-ыг хүчин төгөлдөр бус болохыг тогтоолгох нэхэмжлэл ба Ковидын тусгаарлалт

1 month ago

Бусад мэдээ, мэдээлэл

ШҮҮХИЙН ШИЙДВЭРИЙН ХУРААНГУЙ

Бүгд